Древнейшая служба Благовещения.

На вечерни на Господи, воззвах: стихиры, глас 2:

Благовестник Гавриил пришед к Марии, рече Ей: Благодатная, Господь с Тобою! Зане явишися Храм Духа Святаго, и Христос воплотится от Тебе.

Удивися Мария о словеси Гавриилове и рече ему: Ужасает Мя пришествие твое. Како будет сие? Дева бо есмь и мужа не знаю.

Архангел отвещав рече Марии: Благодатная, радуйся! Благословена Ты в женах! Ибо Дух Святый найдет на Тя и Сила Вышняго осенит Тя.

Блаженная Мариам благовестнику Ангелу рече: Се, раба Господня, буди Мне по глаголу твоему. И отыде от Нея Ангел.

Слава, и ныне, глас тойже:

Скиния явися Блаженная Мария Небесе и земли, яко Творца понесе, от Нея бо произыде душ наших Избавитель, нас ради распятие претерпев.

На стиховне Октоиха. Слава, и ныне, глас 6:

От Бога изшед Гавриил Ангел благовестити Тебе, Дево Марие, и рече: Радуйся! Господь с Тобою.

На утрени канон, глас 1.

Песнь 1. Воспоим:

Ирмос: Воспоим песнь нову/ Спасителю и Богу,/ от работы вражия/ свободившему нас/ явлением Своего Божества/ и избавльшему нас,/ славно бо прославися.

Воспоим песнь нову Спасителю и Богу, пославшему ныне к Деве Марии Гавриила Ангела, исполньшаго Ю радости.

Ныне Дева радостне, умирися Гавриилом Ангелом, и зача во чреве, прежде век Единосущнаго Отцу и соприсущна Духу.

Песнь 2. Вонми небо:

Ирмос: Вонми́, не́бо, и возглаго́лю,/ и воспою́ Христа́, Спа́са ми́рови,/ еди́наго Человеколю́бца.

Воздадите, людие, славу Богу, всельшемуся ныне во утробу Девы Чистыя.

Праведен и свят есть Господь, прославивый ныне имя Сего Порождшия.

Ангел ныне Деве радость яви от Бога всемирную.

Непорочная Дево, Богородице, моли за ны Господа.

Песнь 3. Утверди:

Ирмос: Утверди́, Го́споди, Це́рковь Твою́,/ ю́же стяжа́л еси́/ си́лою Креста́ Твоего́,/ и́мже врага́ победи́л еси́/ и просвети́л еси́ вселе́нную.

Укрепи, Господи, поющих Тя сердца, пославый ныне Архангела Гавриила, глаголюща: Радуйся, от Тебе родится Царь Славы.

Утверди, Господи, Церковь Твою, непреложно родивыйся от Девы, и даруй миру радость яко Человеколюбец.

Еву избавила еси рождеством Твоим, и даровала еси смертным человеком безсмертие. Сего ради Богородице поклоняемся и величаем.

Песнь 4. Господи, услышах:

Ирмос: Услышах, Господи, слух Твой/ и прославих Тя/ яко Человеколюбца.

Радуйся, Всесвятая, Непорочная Богородице Дево, ибо Предвечное Слово Божие зачася безсеменно гласом Ангельским. Молися о спасении нашем.

Песнь 5. От нощи:

Ирмос: От но́щи у́тренююще,/ Тебе́ сла́ву возсыла́ем, Го́споди Бо́же наш,/ Твой мир даждь нам,/ я́ко, ра́зве Тебе́, бо́га ино́го не ве́мы.

От нощи утренююще, Тебе славу приносим, Господи, пославшему Гавриила Ангела в радость Деве Марии. Обрадовал еси Ю и возвестил вечное сие запечатление.

Воспоим Святую Деву и прославим Ю, бывшую селение Божие, яко Слово воплоти и мир весь спасе.

Помилуй, Христе, уповающих на Рождшую Тя и Деву славящих, яко Благ и Человеколюбец Бог еси, и молитвами Ея спаси души наша.

Песнь 6. Возопих:

Ирмос: Возопих в скорби моей/ к Милостивому Богу,/ и услыша мя Единый Безгрешный,/ и избави мя от тли и смерти Господь.

Благовести Гавриил Ангел Богородице Марии, яко родися от Нея Сын Божий Спаситель, искупльший грех мира.

Слово бысть плоть от Девы и человечество прия непреложно, да спасет мир яко Человеколюбец.

Песнь 7. Благословен:

Ирмос: Авраа́мстии о́троцы в пещи́,/ Тро́ицу прообрази́вше,/ оѓненный пла́мень на ро́су преложи́ша/ и, пою́ще, вопия́ху:/ благослове́н еси́, Бо́же оте́ц на́ших.

Посреде отроков в пещи видимый, и недоведомую тайну Девы поведавый, благословен еси, Боже отец наших.

Пославый Ангела благовестити Деве, да преложится печаль Евы на радость, благословен еси, Боже отец наших.

Вселивыйся во утробу Девыя и естество человечо освятивый, благословен еси, Боже отец наших.

Естеством единосущный Отцу и Всесвятому Духу Бог, и вселивыйся во утробу Девы, благословен еси, Боже отец наших.

Песнь 8. Благословите:

Ирмос: Песнь Тебе́ прино́сим Безпло́тных,/ я́коже о́троцы в пещи́, и, пою́ще, глаго́лем:/ благослови́те, вся дела́ Госпо́дня, Го́спода.

Приидите ныне, вернии, воспоим во утробу Девы Всельшагося, и глаголем: благословите вся дела Господня Господа.

Дево, Слово Бога Отца зачала еси безсеменно, благовестием Ангела. В песнех глаголем: благословите вся дела Господня Господа.

Вернии, поклонению Троице Единосущней наставлени, едиными усты воспоим, и глаголем: благословите вся дела Господня Господа.

Песнь 9. Величит:

Ирмос: Тебе́, ви́денную дверь Иезекии́лем проро́ком,/ е́юже никто́же про́йде, то́кмо Бог еди́н,/ Богоро́дице Де́во, пе́сньми почита́ем.

Тебе, Ангела благовестити Деве пославшаго, и от Нея воплотившася на спасение всех, в песнех величаем.

Тебе, Гавриилом Деве тайну смотрения Твоего поведавша, и от Нея вочеловечшася на спасение наше, в песнех величаем.

Тебе, плотию явльшагося и от Отца не отлучшася, Единаго Творца всех и Спаса рода человеча, в песнех величаем.

На хвалитех стихиры, глас 8:

Радость днесь всему миру: егда уверися Дева от Ангела, Слово сниде с Небесе от Отца.

Благовести Архангел Святей Деве: Радуйся, Обрадованная, Пресвятая Дево Благодатная, Господь с Тобою.

Смутися о целовании Святая Дева и помышляше в Себе: Что убо вхождение сие? И како разумети пришедшаго? Како бо рожду Творца Неба и земли?

Слава, и ныне, глас тойже:

Рече Архангел Святей Деве: Не бойся, Обрадованная, Пресвятая Дево, девство бо Твое непреложно пребудет: Дух Святый найдет на Тя, и сила Вышняго осенит Тя, темже раждаемое Свято и наречется Сын Божий.

Примечание: Указаны ирмосы в 1, 4 и 6 песнях, к остальным песням ирмосы добавлены. Для стихир на хвалитех указан глас.

Источник: Перевод древнейшей службы Благовещения. Василик В.В. Перевод с древнегрузинского языка сделан по изданию: Древний Иадгари. - Тбилиси: Мецниереба, 1980.