Служба обновлению храма святаго архангела Михаила, иже во Александрии.

 Месяца Иуния, в 6-й день.

Обновление храма святаго архангела Михаила, иже во Александрии.

НА ВЕЧЕРНИ,

На Господи воззвах: стихиры, глас 4:

Архангеле первослужителю! Страшному Престолу предстояй, о нас молися, да спасены будут души наша.

Архистратиже сил и служителю Христа Бога, небесных чинов предстоятелю! О нас молися, да спасены будут души наша.

Михаиле, архистратиже небесных сил! Спасителю Христу и Богу предстоя, не престани молитися, да спасены будут души наша.

Слава и ныне, богородичен, глас тойже:

Ангельская воинства обыдоша Девоматерь Марию и рабу Еммануилеву, идеже убо сошествие Господне, тамо и служителем в страсе предстояти. Темже небо и престол глашаем чрево Твое, Всепетая. Убо видящии вся Тобою, Дево, светле ангели и человецы единодушно сликовствуют о таковем достоинстве Твоем, яко сотвори о Тебе велия дела Сильный и Тобою богоподобная всем верным. Святая! Радосте вселенныя! Моли Егоже родила еси, спастися душам нашим.

На стиховне Октоиха.

Слава, глас 6. Подобен: Воскресение Твое, Христе:

Царство Твое, Христе Спасе, ангели поют на Небесех, и нас на земли сподоби, чистым сердцем Тебе славити.

И ныне, богородичен, глас тойже:

Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́, но Сама́ заступи́, и поми́луй мя́.

Тропарь, глас 6:

Архангеле Михаиле! Престола величествия никогдаже отлучаяйся, но за всех выну предстательствуя, в вышних служителех вселенную благослови, и всюду прославляемь испроси милости душам нашим.

Слава и ныне, богородичен, глас тойже:

Бо́га, из Тебе́ воплоти́вшагося, разуме́хом, Богоро́дице Де́во: Того́ моли́ о спасе́нии душ на́ших.

НА УТРЕНИ,

Канон архангела, глас 4.

Песнь 1.

Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Воспою Тебе, Господи Боже мой, ангелы Своя огнь палящ сотворившему, и служители людем Твоим, песнь хвалебную.

Чиноначальник вышних сил безплотных Михаил купно с нами ликовствует, на божественную трапезу вся созываяй.

Яко чистому естеству, божественну и всесвяту, выну тебе о перстных приносим, славне архистратиже Михаиле, спастися душам нашим.

Богородичен: Радуйся, Неискусомужная Богородице, во чреве заченшая Христа Бога нашего, и ныне моли спастися душам нашим.

Песнь 3.

Ирмос: В Го́споде Бо́зе мое́м/ се́рдце мое́ утверди́ся,/ тем немощству́ющии препоя́сашася си́лою.

Спасителю всех всегда предстоя, Михаиле, моли непрестанно, да помилована будет паства твоя.

Ликостояния безплотных в твоем храме, архистратиже, с верными спирствуют, славяще Христа Бога.

Ангел предстоятелю Михаиле, Христа сущаго Бога моли присно, да помилованы будут души наша.

Богородичен: Родждшая Бога, о нас ходатайство сотвори, к Тебе, Богородице, грешнии прибегаем.

Седален, глас 5:

Горних воинств архистратига днесь достойно почтим, мстителя церковнаго и вселенныя хранителя, тому поюще: радуйся Михаиле, архангеле Христа Бога нашего.

Слава и ныне, богородичен, глас и подобен тойже:

Радуйся, одушевленный Храме Божий и Врата Непроходимая; радуйся, неопалимый и огнеобразный Престоле; радуйся, Мати Еммануила, Христа Бога нашего.

Песнь 4.

Ирмос: Небеса́ доброде́тель Твоя́ покры́ла есть,/ и земля́ испо́лнися/ сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.

Безплотных согласия празднуют в твоем храме, архистратиже, богоподобно взывающе: слава силе Твоей, Господи.

Ангельских ликов чиноначальниче Михаиле! Благодетеля Христа и Бога Иисуса присно моли православную спасти паству Свою.

Триипостасное Божество воспоим, с херувимы и серафимы победную песнь, непрестанными устнами во веки славяще.

Богородичен: Ангельския чины преимущи и Бога во объятиих носящи, Благословенная, Чистая, спаси и нас, поющих Тя!

Песнь 5.

Ирмос: Возсия́вый Свет,/ и просвети́вый у́тро,/ и показа́вый день,/ сла́ва Тебе́, сла́ва Тебе́,/ Иису́се, Сы́не Бо́жий.

Безплотных лицы песнь немолчно славословят, взывающе: слава Тебе, слава Тебе, Иисусе, Сыне Божий!

Со Отцем и Духом безплотными воспеваемый непрестанно: слава Тебе, слава Тебе, Иисусе, Сыне Божий!

Богородичен: От Девы Чистыя благоволил еси родитися, воплощенне Боже, слава Тебе, слава Тебе, Иисусе, Сыне Божий!

Песнь 6.

Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Со ангелы да ликуим вси в дому архангельстем, славословяще Христа, и прегрешений разрешение единогласно у Него просяще.

Божественное и высшее Естество со ангелы славим, в триех ипостасех Единаго, Христом благочестно познающе, в разделении и единстве.

Богородичен: Моли о Твоих рабех, Браконеискусная Богородице, от Тебе воплощенна Бога нашего, Тебе убо и едину Заступницу свемы.

Кондак, глас 3. Подобен: Дева днесь:

Вернии днесь в невещественнаго храме, песни благодарения Михаилу приносят, ангели с ними славословят, в единый лик с бренными совокупляющеся: нас бо ради прииде Архистратиг силы Божия.

Икос:

Александриом да сорадуется вся вселенная, прославляюще верховника небесных воинств, Михаила первоангела, православных защитителя и нечестивых посрамителя, верных царей поборника и сопротивных прогонителя, днесь бо обновися в велицем граде ангелоначальника храм. Сего ради в том собравшеся светоявленно возопиим: нас бо ради прииде Архистратиг силы Божия.

Песнь 7.

Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же,/ благослове́н еси́.

Безплотных ликования Самаго Владыку в храме твоем, архистратиже, в песнех величаем: отец наших Боже, благословен еси.

Тебе немолчно вси ангельстии чини славословят, победную песнь Тебе приносяще: отец наших Боже, благословен еси.

Богородичен: Безневестная Мати, Богородительнице Дево, Чистая Марие, Егоже зачала еси, непрестанно моли, низпослати нам разрешение грехов.

Песнь 8.

Ирмос: Вся дела́ Бо́жия и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Безбожное учение мучителево попраша отроцы оросившейся пещи, образующе Троицу, богооткровенныя песни воспевающе во вся веки.

Чини ангел Тебе немолчно песнословят, Спасителя и Бога нашего, во плоти явльшася нам, богооткровенными песньми воспевающе во вся веки.

Моли, о архистратиже Михаиле, Спаса о православней пастве твоей, да избавит ю от бед, и дарует ей велию милость, поющу Его во вся веки.

Страшному Твоему престолу предстоят шестокрилая животна, трисвятую песнь во веки воспевающе, и миру Тебе, Триипостасна Бога, возвещающе.

Песнь 9.

Ирмос: Велича́ем вси человеколю́бие Твое́,/ Христе́, Спа́се наш,/ Сла́во раб Твои́х/ и Ве́нче ве́рных,/ возвели́чивый па́мять Ро́ждшия Тя.

Ангелов настоятелю Михаиле, Христу Спасу предстоя, не престай молити, да спасет верныя и право Его величающия.

Вышняго естества, ангелов чиноначальниче, Христу предстоя не престай молити Его, милость и мир пастве твоей подавати.

Богородичен: Величаем вси Святую Деву, Живот вечный миру заченшую, и по рождестве Девою неврежденно пребывшую.

На хвалитех стихиры, глас 8. Подобен: Тебе, Царя и Владыку:

Тебе небесная яко Содетелю и Владыце приносят немолчно трисвятую песнь, Отцу и Сыну и Святому Духу.

Твоим снисхождением прежде разстоящияся соединил еси во едину Церковь, ангел и человек, со Отцем, Христе, пети Тебе и со Духом.

Слава и ныне, богородичен, глас и подобен тойже:

Приими плач служителей Твоих, Всесвятая Дево Богородице, и моли непрестанно, отпущению грехов и миру дароватися рабом Твоим.

На стиховне Октоиха. Слава, глас 2:

От страшных и пречистых таинств возмездися архангел Михаил молити о нас, с лики ангельскими, Христа и Спаса мира. Темже и мы взываем ему: слава тебе, начальниче и молитвенниче о душах наших.

И ныне, богородичен, глас тойже:

Радуйся, Пречестная Чистая, рождшая Христа! Молися о просящих Тя спастися душам нашим.

НА ЛИТУРГИИ,

Блаже́нны Арха́нгела, пе́снь 3-я и 6-я. Прокимен, глас 4: Творяй ангелы Своя духи, и слуги Своя пламень огненный. Стих: Благослови душе моя Господа, Господи Боже мой, возвеличился еси зело. Апостол ко Евреем, зачало 303. Аллилуия, глас 8: Ходя́й на крилу́ ве́треню, Творя́й ангелы Своя́ ду́хи. Стих: Хвали́те Го́спода вси́ а́нгели Его́, хвали́те Его́ вся́ си́лы Его́. Ева́нгелие Матфе́я, зача́ло 106. Прича́стен: Творя́й а́нгелы своя́ ду́хи, и слуги́ своя́ пла́мень о́гненный.

Примечание: Древний праздник Александрийской Православной Церкви в честь освящения храма (кесариона) святаго архангела Михаила, совершавшийся 6 Иуния.

Текст службы был адаптирован к современному чинопоследованию. Добавлены седален, кондак с икосом, ирмос 8 песни.

Источник: А. Ю. Никифорова. Панигир архангела Михаила на Синае и в Египте: реконструкция греко-православного чина IX в. Theologia Christiana Academica: научный журнал. — СПб.: Изд-во СПбДА, № 1, 2025.