Древнейший канон св. равноап. Константину Великому.

 Канон святому равноапостольному царю Константину, глас 4.

[Творение преподобнаго Иоанна Дамаскина].

Песнь 1.

Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Тебе, царствующу веки, и поставляющу цари́ неизреченною мудростию, победную вопием песнь, Жизнодавцу Богу.

Познал еси Царя Нетленна, земныя скиптры твоей даровавша руце́, и бысть послушлив служитель, Константине, Христов.

Древле победу Крестом на варвары даровавый Твоему Константину, Сый и Царю нашему ныне пособи.

Богородичен: Воплощеннаго Бога Слова и явльшася нас ради, Святая Дево, неописанно родила еси, выше слова и разума.

Песнь 3.

Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Оружие, Царю, показал еси Твоему Константину Креста победный зрак, варварския прелести потребителя того соделав.

Познал еси, Крестом ограждаемь, Константине, Распятаго непобедимое, и царствия скиптры просветил еси благочестием.

Якоже крестовидныма дланьма в Синаи Амалика чуждаго победил еси, томители вернейшему Царю, Христе, покори.

Богородичен: Предтекши Тебе смерть, поражена бысть Тобою Рожденным, Всенепорочная, сего ради зачало Тя именуем безсмертия.

Седален, глас 8. 

Подобен: Премудрость Слова:

Чувствия устремив к небесным, и звезд красоте научився, сими освящен в познание всех Господа, Креста же оружие посреде блиста, провозвещающе победу и державу. Сего ради души твоея отверзл еси очи, прочет надписание, и научился еси образу, Константине всечестне. Моли Христа Бога даровати грехов оставление.

Иный, глас 4. 

Подобен: Скоро предвари:

Благочестная память твоя, явльшися нам, просвещает концы днесь светом богопознания. Константине богоприятне, яко благочестен посреде царей показался еси, сохрань законы Царя Небеснаго, тем молитвами твоими напастей нас избави.

Слава, и ныне, богородичен, глас тойже:

Не умолчим никогда, Богородице, силы Твоя глаголати, недостойнии: aще бо Ты не бы предстояла молящи, кто бы нас избaвил от толиких бед; кто же бы сохранил до ныне свободны; не отступим, Владычице, от Тебе, Твоя бо рабы спасaеши присно от всяких лютых.

Песнь 4.

Ирмос: Небеса́ доброде́тель Твоя́ покры́ла есть,/ и земля́ испо́лнися/ сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.

Воспеваем боговенчанный твой верх, земных царей всех праведнейше, Православия утверждение, Вышняго Царствия достойне.

Царствие твое, преславне, украсися правдою, и кротостию, и милосердием, Православием блистающе, сего ради вечнует память твоя.

Раболепно Присноцарствующему багряницу и скиптры, Константине, Христу повинул еси, вопия: слава силе Твоей, Господи.

Даждь нам крепость противу враг Царя христолюбиваго, покоряя чада неистовая Агари, покланяющимся древу Креста.

На нечестивыя одержащия и богоборныя, Христе, боговенчанному Царю нашему спобори, о Кресте убо Твоем уповает, того стяжав пособие.

Богородичен: Херувимския чины превозшедши, и Бога во объятиих держимаго не безплотна носивши, радуйся, Богородице Безневестная.

Песнь 5.

Ирмос: Возсия́вый Свет,/ и просвети́вый у́тро,/ и показа́вый день,/ сла́ва Тебе́, сла́ва Тебе́,/ Иису́се, Сы́не Бо́жий.

Единоплеменным языком царствуя, Богу венчавшему тя вопиял еси: слава Тебе, слава Тебе, Иисусе, Сыне Божий!

Светло багряницею и венцем блистая, паче просиял еси верою и надеждею, и любовию Христовою, славне.

Вознесенную бровь покори, Спасе, верою вопиющим: слава Тебе, слава Тебе, Иисусе, Сыне Божий!

Вооружил еси вернаго Царя Крестом, и утвердися верою. Слава Тебе, слава Тебе, Иисусе, Сыне Божий!

Богородичен: Ангельский глас тварь немолчно Тебе приносит, Дево: Радуйся, Мати, вопиющи: Иисусе, Сыне Божий!

Песнь 6.

Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Боговенчанне, иже благочестия водимь помыслы, и мужески страстем самодержец явився, правдою правил еси люди Божия.

От Бога восприем скиптры царства, державу Давшему и себе повинул еси, послушным, Константине, Христа нарекся.

Поспешения земная надежда исчезе, но едине Державне и Сильне, возстани и помози людем Твоим, Христе, тех избавляя.

Даруй верному Царю, молим Тя, крепость на враги наша Животворящим Крестом Твоим, Христе, о Тебе бо хвалимся, и уповающе на Тя спасаемся.

Богородичен: Молимся, о молящихтися, Непорочная, Всесвятая, умоли от Тебе Воплощшагося, Тебе бо и едину Заступницу нашу вемы.

Кондак, глас 3. 

Подобен: Дева днесь:

Елена днесь любовию Христово Древо являет, еже славное Креста воспоминание вся иудеи собирает, ибо един Иуда того показует, нас бо ради явися знамение велие.

Икос:

Днесь царицу да воспоим, пророка глаголы взыскавшу: в кедре, певке, и кипарисе. Любовию сему та последова и вся изъявивши иудеем, готовящися Оправдание явити народом великое, иудеи сокрытое. Сие показа о́на, темже всем победительное явися знамение велие.

Песнь 7.

Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же,/ благослове́н еси́.

Смотрением Божиим единоплеменным родом царствия владевый, Константине, рекл еси: отец наших, Боже, благословен еси.

Вооружився Крестом на варвары, владыко, победоносец нареклся еси, Константине славне, благословен еси, вопия, Едине Благодетелю.

Яко христослужитель, владыко, и царь крестоносный, апостолом сопричтался еси, Константине славне, благословен еси, вопия, Едине Благодетелю.

Срастворивый милосердию мужество души твоея, подвластным милостивейший, врагом же страшнейший, и царь истинен делы показался еси.

Боговенчанному, Христе, и Царю вернейшему на варвары победы даруй, да Тебе вопием: отец наших, Боже, благословен еси.

Богородичен: Неопалимая Купина и сияние росоносно образоваша Тя, Мати Безмужная, неизреченно родившу Воплощеннаго Бога, Чистая, Благословенная.

Песнь 8.

Ирмос: На Кресте́ пло́тию пригвожде́ннаго/ и показа́вшаго нам ору́жие во спасе́ние,/ о́троцы, превозноси́те Христа́, Бо́га на́шего, во ве́ки.

Тебе Победотво́рца явися, владыко, сокровенное под землею, на высоте блистающе, оружие Животворящаго Креста, Егоже славословим во веки.

Животворный Крест возжелел еси, яко присуще от земли богатство ископати, владыко, всем воспевающим Христа Бога нашего во веки.

Богоподобно Креста святилище и Воскресения Христова устрояяй, вопиял еси: да вси превозносим Христа, Бога нашего, во веки.

Покажи победителя и победоносца на варвары нечестивыя, Христе, Царя, да всегда воспеваем Тя, Спасе, Бога нашего во веки.

Песнь 9.

Ирмос: Тя, Невмести́мое Сло́во во утро́бу вмести́вшую,/ Небе́с простра́ннейшую/ и Херуви́мов сла́внейшую,/ Богоро́дице Чи́стая,/ пе́сньми велича́ем.

Главу твою благоволения, Константине славне, оружием венчал еси, и царства скиптры Креста оружием удержал еси, Христос же восприя тя служителя благочестивейша.

Служителем Авраама равночисленным, Константине славне, противу прелести собрал еси защитники Троицы, Сына единосущна и Духа Отцу, возвещающия Едино Божество.

Якоже Константину древле Крестом Твоим сокрушил еси варвар твердыни, тако враги Креста Твоего и ныне Царю боговенчанному державною рукою Твоею, Спасе, покори.

Источник: Древнейший канон святому равноапостольному Константину Великому. Василик В.В. Церковь и Лира. — Санкт-Петербург: Алетейя, 2020.

Древнейший канон св. равноап. Константину Великому ( перевод и комментарии: диакон Владимир Василик).