Древнейший канон Успению Пресвятой Богородицы.

Древнейший канон Успению Пресвятой Богородицы, глас 3.

Песнь 1. Поим Господеви:

Ирмос: Пои́м Го́сподеви, / сотво́ршему ди́вная чудеса́ в Чермне́м мо́ри, / по́нтом бо покры́ проти́вныя и спасе́ Изра́иля, / Тому́ Еди́ному пои́м, я́ко просла́вися.

Воспоим Господеви, преставльшему Всенепорочную Матерь Свою Деву, и явльшему Ю несравненно превыше Сил небесных, и светом Божества Тую украсшему.

Всех верных множество, о Богородице Непорочная, ныне преставлению Твоему в песнех радуется, молитвами бо Твоими оставление грехов даруется.

Непорочная Мати и Дево, умоли Господа нашего даровати спасение нам. Того ради славишися, мы же благодарственно вопием: славно бо прославися!

Песнь 2. Вонми небо:

Ирмос: Вонми́, земле́ и не́бо, / и внуши́ глаго́лы моя́, / возглаго́лю бо на земли́ Бо́жия чудеса́.

Ущедри уповающия на Тя, Господи Боже мой, молитвами Богородицы Твоея.

Истинен и праведен есть Господь, яко возвеличи упокоение Рождшия Его.

Ирмос: Ви́дите, ви́дите, я́ко Аз есмь Спас ми́ра, / Свет и́стинный, Исто́чник жи́зни, / Сын Бо́жий.

Видите, видите Господа Бога нашего, просветившаго преставление Рождшия Его и исцелившаго болезни.

Слава Тебе, слава Тебе, Царю славы, преставльшему Матерь Свою к жизни вечней. Еяже молитвами помилуй поющия Тя.

Песнь 3. Утверди:

Ирмос: Утверди́ся се́рдце мое́ в Го́споде, / вознесе́ся рог мой в Бо́зе мое́м, / я́ко несть свят, па́че Тебе́, Го́споди.

Утвердися сердце мое в Господе, и вознесеся рог мой в Бозе моем, яко возвеличи днесь преставление Рождшия Его.

Радости исполнися днесь Дева в преставлении от мира, Господи, ко свету безконечному.

Матери Твоей, Христе, Богородице воспеваем вернии непрестанно, молитвами Ея избави души наша от всякаго искушения.

Песнь 4. Господи, услышах:

Ирмос: Господи, услышах слух Твой и убояхся, / разумех дела Твоя и ужасохся.

В преставлении Твоем, Богородице Непорочная, молении Твоими умоли о молящих Тя.

Воспеваем Тя, Пресвятая Дево, и славим Христа Бога, воплотившагося от Тебе.

Чудесами милости Твоея исправи мя, просвети, Человеколюбче, поющия Рождшую Тя.

Песнь 5. От нощи:

Ирмос: Твой мир даждь нам, Сы́не Бо́жий, / ино́го бо, ра́зве Тебе́, Бо́га не ве́мы, / в Вы́шних со Отце́м и Ду́хом сла́вимаго.

От нощи утренююще воспеваем Тя, Христе Боже, и молимся Тебе, Человеколюбче, спаси нас молитвами Рождшия Тя.

Собори верных воспевают Тя, Пресвятая Дево днесь, в преставлении Твоем моли Господа спасти нас, недостойных раб Твоих.

От рода Давидова изшедшую хвалим Тя, во чреве Сына Божия поносившую, и плотию родившую.

Троичен: Твой мир даждь нам, Христе, Сыне Божий, яко не вемы иного бога, разве Тебе, со Отцем и Духом Святым славима.

Песнь 6. Возопих:

Ирмос: Воззва́х воздыха́нии немо́лчными к Ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

Воспоим вси Деве Марии чистым сердцем, яко преставися ныне ко Свету безсмертия, и молит непрестанно о душах наших.

От семене Давидова возсияла еси, Дево Непорочная, безсеменно рождши Христа, Бога нашего, человека от клятвы избавльша.

Песнь 7. Благословен еси:

Ирмос: Трие́ о́троцы в пещи́, Тро́ицы силою, / пламень о́гненный угасиша / и, пою́ще, вопия́ху: / благослове́н еси́, Бо́же оте́ц на́ших.

Преставление Богоматере совершаем днесь, и молимся Тебе, Содетелю всех: оставление грехов подаждь, Боже отец наших.

Днесь Дева преставляется, Господи, к безсмертней жизни, к Тебе, Человеколюбче, сего ради благодарственно взываем: благословен еси, Боже отец наших.

Троичен: Троице поклоняемся, Единей Силе, Отцу и Сыну и Духу Святому, поюще: благословен еси, Боже отец наших.

Песнь 8. Благословите:

Ирмос: Покланя́емаго от святы́х А́нгел / и Сла́вимаго непреста́нно, / свяще́нницы, по́йте, / лю́дие, превозноси́те во вся ве́ки.

Приидите, вернии, возрадуемся, яко Возжелавый спасения всего мира ныне преставляет Матерь Свою, Ейже вернии сподобишася поклонитися и воспети: священницы, благословите, людие, превозносите во веки.

Концы земнии ублажают преставление Твое, Пресвятая Богородице Дево, ибо Еву от падения возставила еси, и поношение праматере потребила еси, и яко Дверь небесная явилася еси: священницы, благословите, людие, превозносите во веки.

Безневестное рождество Твое, Христе, возсия всему миру, и преставление Девы путь жизни явися верным Твоим, и дарова всем нам рай. Священницы, благословите, людие, превозносите во веки.

Преставившаго Матерь Свою к жизни безконечней, священницы, благословите, люди, превозносите во веки.

Песнь 9. Величит:

Ирмос: Тя, Матерь Света, и по рождестве Деву, и душам нашим обитель живота, Богородице Марие, в песнех величаем.

Тя, прославившаго преставление Всехвальныя Родительницы Твоея и Ею подавшаго оставление грехов душам нашим, славим Тя, Ты бо спасл еси души наша.

В песнех славим Тя, непорочно сохраншую девство Свое, храм бо Духа Святаго явися, и отверзла еси дверь чертога небеснаго. Вси вкупе преставление Девы в песнех славим.

В песнех славим Тя, радостию исполнившу весь мир, ныне преставльшуся Матерь Царя, Еюже подается оставление грехов и велия милость. Вси вкупе преставление Девы в песнех славим.

Примечание: Указан глас и добавлены в некоторых песнях отсутствующие ирмосы.

Источник: Перевод древнейшего канона Успению. Василик В.В. Перевод с древнегрузинского языка сделан по изданию: Древний Иадгари. — Тбилиси: Мецниереба, 1980.